ZERNOLA OLINPIADA

DBHko 1. eta 2. mailako ikasleentzako olinpiada da; zientziaren inguruko olinpiada. Helburua da zientzia era atseginean jorratzea eta teknologia berrietan trebatzea. Horrez gain, gazteek parte hartzea eta gelakideek elkarri laguntzea sustatu nahi dugu. IX. Zernola Olinpiada izango da 2010/2011 ikasturtekoa, eta berrikuntza ugari dakartzagu aurten.


MAIZTASUNA

Hil bakoitzean, urritik apirilera, proba bat jarriko dugu www.zernola.net web guneko ZN OLINPIADA atalean (ikus egutegia). Ordutik aurrera, 4 aste inguruko epea izango duzue erantzuna prestatzeko. Eta handik astebetera ikusi ahalko duzue erantzunen puntuazioa. Guztira 5 proba osatu beharko dituzue. Bostgarren proban, olinpiada osoan osatu duzuen bloga baloratuko dugu. Beraz, ez utzi amaierarako!

NOLA PARTE HARTU

Izen ematea
www.zernola.net web guneko ZN OLINPIADA atalean aurkituko duzue izena emateko orria. Zuen datuez, taldeko argazkiaz eta helbide elektronikoaz gain, erabiltzaile-izen eta pasahitz bana bidali beharko dituzue. Hori egindakoan, blog bat izango duzue Zernola olinpiadan.

Zuen bloga
Blog bat edukitzea koaderno publiko bat edukitzea bezalakoa da. Alegia, blog edo koaderno horretan, zuek jarriko duzue edukia, baina beste guztiok irakurri eta ikusi ahalko dugu eduki hori, bai eta iruzkinak egin ere. Beraz, Interneteko eduki-sortzaile bihurtuko zarete! Zuen blogean dagoen edukia zuek kudeatuko duzue beti, aurrez erabakitako erabiltzaile-izena eta pasahitza sartuta. Blogaren kudeaketak aukera hauek eskaintzen ditu:

• Aldatu taldearen datuak: edozein unetan zuen datuak aldatu nahi izanez gero, hor duzue aukera.
• Proba sartu: IX. ZN Olinpiadan, parte-hartzaile bakoitzak bere bloga izango du; hala, blog horretan argitaratuko dituzue hil bakoitzean egindako probak, eta guztiok ikusi ahalko ditugu guztion lanak. Baina, parte-hartzaile guztiok baldintza berak izan ditzazuen, zuek zuen blogean hileko proba argitaratu arren, ez da besteentzako ikusgai egongo, proba horren epea amaitu arte. Epe hori amaitutakoan egongo dira parte-hartzaile guztien proba berriak ikusgai. Ados?
• Berria sartu/aldatu: aurrerantzean, zuen berri eman ahal izango duzue Zernolan. Alegia, zer irteera egin duzuen kontatu, prestatzen ari zareten antzerkiaren berri eman edo bestelako berriren bat argitaratu nahi izanez gero, zuen Zernolako blogean argitaratzeko aukera izango duzue, eta besteek aukera izango dute, orobat, argitaratzen duzuen guztiaren inguruko iruzkinak egiteko. Oso erraza da bloga kudeatzea; Zernolarako propio egina dago, eta ez duzue inongo zailtasunik izango.
• Zuen sailkapena. Olinpiadan zuen taldeak zer martxa daraman ikusi ahalko duzue.
  
  Gogoratu azken proban bloga sarituko dela. Blog horretan, zuen eguneroko gauzez hitz egin dezakezue. Gainerako parte-hartzaileen blogetan ere parte har dezakezue, iruzkinak egunez.

Zalantzarik?
Hala ere, edozein zalantza izanez gero, jarri gurekin harremanetan, l.arakistain@elhuyar.com idatzita zein 943 363 040 telefonora deituta eta. Arduraduna Lorea Arakistain da. Izena eman orduko, kontuan izan zuen taldeko argazki bat bidali beharko duzuela; beraz, jarri apain eta segi argazkia ateratzera!

PUNTUAZIOA

Hiru irizpide hartuko ditugu kontuan lanak saritzeko orduan. Lehenik, egokitasunari begiratuko diogu; alegia, eskatutakoari zuzen erantzun ote diozuen. Horrez gain, lana zenbateraino originala den eta zenbat landuta dagoen balioztatuko dugu (sakontasuna, iturriak aipatzea, ikus-entzunezko materiala izatea txertatuta, irakurterraza izatea...) .

Horien arabera, hiru lan aukeratuko ditugu. Lan irabazleak 10 puntu jasoko ditu, bigarrenak 8 puntu eta hirugarrenak, berriz, 6 puntu. Lehengo saria jasotzen duenak, puntuez gain, gela osoarentzako sari bat jasoko du. Gainerako lanek 3 puntu eskuratuko dituzte, epez kanpo bidaltzen dutenek 1 puntu, eta probarik bidaltzen ez duten ikasgelek 0 puntu. Gainera, proba bakoitzean arrazoiren batengatik lanen bat nabarmenduz gero, lau puntu jasoko dituzte lan horien egileek. Aipamen berezia jasoko dute lan horiek, eta, gehienez, bost aipamen egingo ditugu probako.

SAILKAPENA

Sailkapenean, proban lortutako puntuazioa nahiz puntuazio orokorra ikusi ahalko dituzue, baina zuen proba guztien puntuazioa zuek bakarrik ikusiko duzue, zuen blogaren kudeaketa-eremutik bertatik.

ETA SARIAK ZER?

Proba horietako bakoitza irabazten duen gelak opari bat eta irteera bat lortuko ditu, hil horretako babesleen eskutik. Baina proba bakoitzeko puntuek puntuazio orokorrerako balioko dute.

Amaieran, IX. Zernola Olinpiadaren lehenengo bost sailkatuek sari handiak jasoko dituzte. Lehenengo saridunek Zuatzako aterpetxean egingo dute bi eguneko egonaldia; egonaldi horretan, besteak beste kirol-ekintzak egingo dituzte, Arabako Foru Aldundiaren babesari esker. Bigarren saridunak Senda Viva natura-parkera joango dira, bi egun pasatzera. Natura-parkeaz gozatzeaz gain, gau bat igaroko dute han, parkearen babesletzari esker. Hirugarren sailkatuek Sobron Abenturakoekin egingo dituzte kirol-ekintzak, Arabako Sobron ibaian, egun bateko txangoan.

Hiru horiei esker banatu ahal izango ditugu Zernola Olinpiadaren sari nagusiak: