Lapikoan / Artikuluak / Lurraren zientziak; Ingurumena; Teknologia

Itsasoko energia elektrizitatea sortzeko

2002/11/07 Elhuyar

Noizbait pentsatu al duzu itsasoak duen indarra elektrizitatea sortzeko erabili daitekeela? Bada, Norvegiako herri batean ideia hori egia bilakatu da.

Ziurrenik, itsasoan bainatzen zaren bakoitzean sumatuko duzu olatuek eta itsas-korronteek nolako indarra duten. Zientzialariak aspalditik dabiltza indar hori elektrizitate nola bilakatu asmatu nahian. Hainbat saiakuntza egin dira, baita tresna ugari asmatu ere, baina ia gehienak garestiegiak suertatu dira.

Hala ere, Norvegiako Hammerfest herrian hain garestia ez den sistema bat ezarri dute mareen gorabeherek sortzen duten energia aprobetxatzeko. Kostaldean, itsas hondoan, turbina batzuk jarri dituzte. Marea gorantz edo beherantz joaten den bakoitzean, uraren mugimenduak turbinak birarazten ditu eta horrela, biratzean, elektrizitatea sortzen dute, haize-errota baten antzera.

Adituen esanean, orain arte jarritako turbinekin 1.000 pertsonarentzako elektrizitatea sortzen da. Eta 2004rako herri osorako energia sortzeko adina turbina jarriko direla esan dute, hots, 11.000 pertsonarentzako elektrizitatea lortzeko adina.

Kutsatzen ez duen sistema bada ere, petrolioa edo ikatza erabiltzea baino garestiagoa dela aitortu dute adituek. Hala ere, erabiltzaileak prest omen daude diru hori ordaintzeko, horrela ingurumena gutxiago kutsatzea lortzen bada.